الزمالك يتلقى عزاء محمد صبري في مسجد «الحامدية الشاذلية» اليوم - الأول نيوز

يتلقى نادي الزمالك، اليوم، واجب العزاء في لاعبه الراحل محمد صبري، بمسجد الحامدية الشاذلية، بحضور نجوم الكرة المصرية وقدامى القلعة البيضاء.

وغيب الموت محمد صبري، بعد أزمة صحية مفاجئة، تسببت في الدخول بسيارته في جدار أثناء سيره على طريق التجمع الخامس خلال عودته لمنزله. 

آدم صبري يودع والده برسالة مؤثرة

وودع آدم صبري نجل لاعب الزمالك السابق، والده وكتب عبر صفحته على «فيس بوك»: «بسم الله الرحمن الرحيم، رسالة إلى عزيزي وحبيبي وأعز ناس لقلبي مع أمي، صحبي وأخويا وأبويا، كنت يا حبيبي أكتر حد الناس بترتاح له في الكلام، كنت حد كويس أوي، وبشهادة كل الناس، لي كتير معاك حلو، كتير أوي».

وتابع: «يوم ما رحت السعودية رجعت البيت انهرت من العياط و كنت زعلان جدا عشان هتفارقني وماما كلمتك فيديو وقلت ليا أنا عمري ما هبعد عنك، يوم ما رجعت وكنت جايب ليا حذاء فرحت بيه فرحة عمري ما هنساها، ويوم ما كان عندي ماتش كورة في مدرسة نزلت معايا مخصوص جبتلي حذاء رمادي، مكنتش موافق ألبس (ستارز) عشان خايف على ركبي».

وتابع: «كنت ديما لما حد يتعب تزعل وتتعب وتلغي كل حاجة عشان تقعد معاه يوم ما روحت أول ماتش لي في الاستاد ماتش زمالك وأهلي مع مستر مازن عشان انت كان عندك شغل وبكلمك أنا وآسر بين الشوطين نقول لك إننا كسبانين 1-0، والفرحة اللي كنت فيها وانت بتهنينا».  

وأكمل: «كل يوم لما نرجع من مدرسة ونقعد نتكلم عن ريال وبرشلونة وتقعد تتريق عليا بسبب خسارة ونضحك ونهزر طول الطريق، وتقول ليا مخترع الأسبان، وأنا بحاول أطلع ليك أسبان من ريال يا حبيبي، وتنزل من البيت مخصوص مدينة نصر تجيبني، بعديها نروح التجمع نجيب اخواتي من مدرسة، بعديها ترجع مدينة نصر تودينا تمرين وبعديها تروح البيت لوحدك».

وأردف: «آخر حاجة يا راجل يا جدع إنك مردتش توديني نادي قوي ومشهور ومردتش تودينا أنا وأخويا آسر بيتك اللي هو نادي الزمالك وقلت لوالدتي مش هيروحو نادي ولا هيلعبوا هناك غير لما يكونوا أد الفانلة البيضاء، لأنها تقيلة مش لأي حد، وربتنا على الأصول والجدعنة الرجولة وكل الصفات الحلوة اللي فيك، يوم ما طلبت منك أجيب القطة وافقت عشان تبقى زي حسنات داخلة لينا، وسمتها انت بسبوسة، وإنك كنت قريب ليها وبتميزك عن الكل يا حبيبي».

واختتم: «سيبتلي مسؤولية كبيرة، أمي حبيبتي اللي هحافظ عليها زي ما أنت وصيتني، والوصية إني أكون مع اخواتي، هنفضل مع بعض وباقيين على بعض زي ما أنت طلبت، كان نفسك تروح لمامتك وحماتك واللي هما جداتي، أكتر ناس حنو عليا، أديك رحت ليهم يا حبيبي واتخطفت مننا، والمسيرة الحلوة اللي انت اتظلمت فيها هتعود وهتعب وأشقى أنا واخواتي الثلاثة عشان سيرتك وسط ناس تبقى كويسة زي ما هي يا حبيب قلبي، لو فضلت أتكلم فيك لحد ما أروح ليك مش هخلص يا حبيب قلبي، تستاهل كل خير، أرجو الدعاء له بالرحمة والمغفرة، مع سلامة يا أغلى راجل عرفته في حياتي يا قدوتي».